my5
all

Suvni ko`rmay etik echganlar (feleton)

Mutolaa 09.04.2020, 19:24
Теглар: feleton, koronavirus
1700
Suvni ko`rmay etik echganlar (feleton)

Sulton buvaning qulog`i og`irlashganiga biror fasl bo`ldiyov? Qish bo`yi “Ana boraman, mana boraman...” deb jadalladi, qani yo`li bo`laqolsa. Birisida endi eshakka minib qishloq markazidagi shifokorga ko`rinib kelay deb otlangani... qo`shni mahallaga janozaga aytib qolishdi. Birisida tun bo`yi kampiri javrashidan zada bo`lib, tong sahar eshakni qichaganim bo`lsin, deganida... tongda tursa tizza bo`yi qor yoqqan. Shu havoda eshakni ovora qilmay dedi...

Mana endi bahor kelishi, kunlar ilishi bilan yana shu kampirining zug`umiga chidolmay shifokorga bordiyu... bu yog`ida orttirgan hangomasini qo`yavering.

Bir boshdan aytsak. Ertalab choyini ichib, ko`chalik kiyimlarini kiygancha, kampiriga: “Shu do`xtir bolaning qo`li engil deydilar. Tom bitgan qulog`imni bir ochsin, seni hamsoya kampir bilan devor tagida o`tirgancha shivirlashib, aytadigan mish-mishlarni eshitay, bir adablaringni beray!” deb jo`nagani... tushga yaqin boshi osmonda, ikki qulog`ini tikraytirgancha kelib turibdi-da.

Eshagini devor tagidagi qoziqqa bog`laganicha o`choq boshida kuymanayotgan kampiri ustiga bosib kela boshladi. 

“Ha, ovqating pishdimi? Hidini hali katta ko`prikka etmay sezdim, yog` dog`laganing tovushini undan oldinroq eshitdim. Rahmat, shu do`xtirlarga! Bir ignaga paxta o`rab, yana nimadir purkab bir yuvdi, bir yuvdi qulog`imni. Ajinam qo`zadiyu, yana kulgim keladi. “Tarqa” ochildida quloqvoy! Endi mendan gap yashirib bo`psan!

Sulton buva shunday deganicha hazillashib kampirini quchdi. Kampiri: “Qariganda suyulmang!” deganicha nari itargach, qozon qopqog`ini ochib damini olgan palovga suqlanganicha: “Bay-bay, qo`ling shirinda kampir. Shuning uchun senga uylanganmanda!” dedi. Ko`rsatkich barmog`i bilan dona-dona bo`lib shishgan guruchlarni ushlab ham ko`rdi.

Shu payt kenja o`g`li bog` to`ridan kelib qoldi. Otasining onasi bilan qozon boshida hazillashib turishganiga kulganicha o`tayotgandi, Sobir buva uni to`xtatdi:

-Sen...uyga kir, bog` aylan, takasaltang bo`lib yuraver! Ana Abdulla sartning supraqoqdisi elkasida bir qop sovg`a-salom bilan yurt oshib kelibdi! Bilagida kuchi bor yigit, ishlaydigan vaqtida. Hali qopini aytdim, cho`ntagida anov do`llur deganidan qancha bor? Qarab turinglar, biror hafta ichida mashina olmasa, ko`cha chang`itib o`tmasa...men kafil.

Kampir qozon qopqog`ini ushlaganicha turgan joyida qotdi, so`ragani shu bo`ldi:

-Qaerdan kelayotgan ekan u...oti qursin, qop orqalab?

Sobir buva kiyimlarini almashtirish uchun ichkari yo`nalayotgandi, kampirining savolidan so`ng shu ishyoqmas o`g`lining yana bir bora taddisini beray deb og`zini to`ldirgancha gapirdi:

-Qaerdan, qaerdan? Bu ishyoqmasingga o`xshab, haftada bir marta Devqal`a tagidagi bozorga chiqib, topgani papirosiga etmaydigan ishmas. Shimkentdan kelayotgan ekan...

Sobir buvaning gapi og`zida qoldi. Kampiri qopqoqni qozonga bostirishni unutib, yoniga keldi. Rangi g`alat tusga kirgandi. Ovozi yanayam qo`rqinchli chiqdi:

-Qaydan kelayotgan ekan?!

-Shimkentdan dedi. Qozoq bovurlarimiz yurtida bu!

-Nima?! Siz...siz o`sha bola bilan ko`rishdingizmi?

Sobir buva elka qisdi, ajablandi.

-Nega ko`rishmay? Ko`rishdim. Necha mozor bosib kelayapti axir. Yuzlarini silab, tavof ham qildim...

Kampiri o`zini tashlab yuboray dedi, ovozidagi vahimaga osh pishadigan.

-Ko`rishdim?! Yuzini siladim? Qachon?!

Sobir buva sergaklandi:

-Qachon? Do`xtirga borishda. Nima qilibdi? Pes ochibdimi?

Endi sergaklanish navbati kampiriga etgandi.

-Ahmoq chol! Esini egan chol! Axir...anov  kasallik tarqaldi, deb televizor bir oyki sayrab yotibdiku! Qozoqdan kelgan bo`lsa uning ustiga! To`rt oyki, og`zimda og`iz qolmadi, do`xtirga boring, deb. Bu qulog`i tom bitganning hech nimadan xabari yo`q. Yana...yana yuzini silabdimish. Voy o`lay...

Boshlandi. Sobir buvaga kiyimlarini almashtirish buyurmagan ekan. Kampiri qistovi bilan qayta eshakka mindi, hatto uzoq yo`l bosib kelganidan og`zi qurigandi, kampiri qurmagur bir kosa suv bermadi. Mazali hidi chiqib turgan bir qozon palov axlat o`rasiga ag`darildi. Kampir boya choli quchoqlagani esiga tushib, ustidagi neki kiyimi bor, o`choqqa qaladi.

Sobir buva eshakda, kampiri o`n qadam ortda, o`g`li biror o`n besh odim oldinda qishloq markaziga jo`nadilar...

Boyagina do`xtirlar hazillashgancha kuzatib qo`ygan vrachlik punkti haliyam gavjum edi. Sobir buva qaytib kelganini ko`rib, tag`in hazillashmoqchi edilar... kampir voqeani aytgach, hammasi suvga tushgan mushukdek shumshaygancha joyida qotishdi.

Tuman markazidan “tez yordam” chaqirtirildi. Sobir buva bilan ko`rishgan kimki bor ro`yxati tuzildi. Do`xtir yonidagi hamshira bu xabardan sal bo`lmasa hushini yo`qotay, dedi.

O`n chog`lik odam mingan “tez yordam” va yana bir shifokorning “Neksiya”si tuman markaziga jo`nadi. Kimningdir taklifi bilan Sobir buvaning eshagini punkt bog`iga o`tkazib, qandaydir dorilar bilan rosa shalabbo qilib ezishdi...

Koronavirusga gumondor deb topilganlar tuman shifoxonasining alohida bo`limiga joylashtirilib, yuzlariga niqob, ustlariga g`alati kiyim kiygan shifokorlar ulardan tahlil uchun qon olishga kirishdilar.

Qulog`i ochilganidan beri dunyolarga sig`may yurgan Sobir buvani alohida bir xonaga kiritishdi...

Ikki soatlardan so`ng uchastka noziri Boltaboy shifoxonaga etib keldi va kutilmaganda hammasini karantindan ozod qilib, uylariga tarqashni buyurdi. 

 Bor gap shu!

Ro`zimboy HASAN

Karikaturachi rassom: Husan Sodiqov

Шарҳлар